وزارت صحت عامه ی افغانستان از ایجاد اولین بانک معلومات صحی در افغانستان خبر داده است. این بانک معلومات که یک سیستم انترنتی است، آمار و معلومات مورد نیاز را ذخیره و در دسترس مردم و نهادهای مختلف قرار می‌دهد.
هدف اساسی از ایجاد این بانک معلومات صحی “بهبود در انسجام و استفاده از ارقام صحی به منظور بهبود پلان‌گذاری، تصمیم گیری و نظارت از برنامه‌های صحی” گفته شده است.
دوکتور فیروزالدین فیروز وزیر صحت افغانستان، امروز در مراسم افتتاح این مرکز در کابل گفته است که “این بانک، دسترسی به موقع دست اندرکاران صحت را به معلومات صحی افزایش می‌دهد.”
وزیر صحت عامه افغانستان هم‌چنین گفته است که این وزارت متعهد است تا “با استفاده از روش‌های جدید، عرضه خدمات صحی را بهبود بخشیده و زمینه‌ی دسترسی به خدمات با کیفیت صحی را در سراسر کشور افزایش دهد.” به گفته‌ی آقای فیروز، این اقدام مسوولان این وزارت را در رابطه با “شفافیت و حساب‌دهی” نیز کمک خواهد نمود.
مقامات وزارت صحت افغانستان می‌گویند که “با معرفی بانک معلومات صحی، که از نرم افزار معلومات صحی حوزوی (District Health Information Software 2) استفاده بعمل آمده است، آمرین برنامه‌های صحی، پالیسی‌سازان، شرکای صحی و مردم عام به سادگی می‌توانند به ارقام و معلومات صحی دسترسی داشته باشند.”