اتاق تجارت و صنایع افغانستان می‌گوید که 18 تن خربوزه این کشور که قرار بود از راه تاجیکستان به روسیه صادر شود، پیش از رسیدن به روسیه فاسد شده است.
مسوولان اتاق تجارت و صنایع افغانستان گفته‌اند که این خربوزه ها از ولایت قندوز برای فرستادن به بازارهای روسیه بارگیری شده بود اما به دلایل نامعلوم، ارسال این محصولات از تاجیکستان به روسیه با تاخیر 6 روزه روبرو شده است.
هم‌چنان صیام پسرلی، سخن‌گوی اتاق تجارت و صنایع افغانستان گفته است ”به دلیل مشکلات موجود، بخش زیادی از خربوزه‌ها در تاجیکستان فاسد شده است و حکومت افغانستان نیز در این بخش هیچ اقدامی نکرده است.”
در همین حال مسافر قوقندی، سخن‌گوی وزارت تجارت و صنایع این کشور بروز اختلاف میان بازرگانان افغان در تاجیکستان را، دلیل تاخیر در ارسال و فاسد شدن این محصولات دانسته است.
با این حال برخی از آگاهان اقتصادی، حکومت افغانستان را متهم به بی پروایی در بهبود وضعیت صادرات میوه‌های تازه این کشور به بازارهای خارجی می‌‌دانند.