ریاست اجرایی حکومت اعلام کرده که داکتر عبدالله عبدالله برای اشتراک در سی‌امین اجلاس سالانه “کران‌مونتانا” به سویس رفته است.
دفتر مطبوعاتی ریاست اجرایی امروز پنج‌شنبه(6سرطان) با نشر یک خبرنامه گفته است، آقای عبدالله صبح امروز به دعوت رسمی “جین‌پول کرتن”، رییس عمومی نهاد بین‌المللی کران مونتانا، جهت اشتراک در سی‌امین اجلاس سالانه این نهاد وارد سویس شده است.
بر اساس این خبرنامه، قرار است آقای عبدالله در حاشیه این اجلاس با شماری از نمایندگان کشورهای اشتراک‌کننده و روسای سازمان‌های بین‌المللی دیدار و گفتگو کند.
سی‌امین اجلاس سالانه کران مونتانا از ۲۶ تا ۲۹ ماه جون ۲۰۱۹ در شهر ژنو سویس با حضور روسای دول، نخست‌وزیران، وزرا، سیاست‌مداران، روسا و نمایندگان سازمان‌های بین‌المللی، سازمان‌های منطقه‌ای، سازمان‌های غیردولتی، تاجران و سرمایه‌گذاران بیش از 100 کشور برگزار می‌گردد.
این در حالی است که رییس‌جمهور غنی نیز صبح امروز پنج‌شنبه(6 سرطان) در رأس یک هیأت عالی‌رتبه دولتی به پاکستان سفر کرده است.
افزودن دیدگاه