ارگ ریاست جمهوری اعلام کرده است که امام علی رحمان رییس جمهور تاجیکستان در گفتگوی تلیفونی رییس جمهور غنی را به تاجیکستان دعوت کرده است.
ارگ ریاست جمهوری امروز دوشنبه (۳اسد) گفته است رییس جمهور غنی و امام علی رحمان در گفتگوی تلیفونی در مورد روابط دوجانبه به ویژه در خصوص تجارت، ترانزیت، تقویت هر چه بیشتر همکاری های منطقوی و افزایش همکاری ها در امتداد سواحل دریای آمو، صحبت کردند.
ارگ افزوده که رییس جمهور غنی گفته است که سرحد افغانستان و تاجیکستان به نقطۀ دوستی و پیشرفت میان دو کشور مبدل می شود و نمونۀ دوستی و همکاری خوب میان دو همسایه خواهد بود.
به گفته ارگ ریاست جمهوری در این گفتگوی تیلفونی دو جانب توافق کرده اند که تحت ریاست محمد حنیف اتمر سرپرست وزارت امور خارجه، هیئت بین الوزارتی در روزهای نزدیک به تاجیکستان سفر و روی آجندای نشست رؤسای جمهور تاجیکستان و افغانستان به خاطر همکاری های بیشتر، کار کند.
گفتگوهای صلح افغانستان
در اعلامیه ارگ آمده است که در گفتگو میان دو رییس جمهور امام علی رحمان ضمن حمایت از پروسۀ صلح به رهبری و مالکیت حکومت افغانستان وعده داده که تاجیکستان در نشست های منطقه ی و بین المللی، در کنار افغانستان خواهد بود و از موقف حکومت افغانستان حمایت می کند.
رییس جمهور تاجکستان از رییس جمهور غنی به خاطر گسترش روابط دوجانبه و چندین جانبه و توسعه همکاری ها دعوت کرده به تاجیکستان سفر کند و این دعوت از سوی غنی پذیرفته شده است.
به گفته ارگ رییس جمهور غنی نیز از امام علی رحمان به خاطر سفر به افغانستان نیز دعوت کرده است.
ارگ خاطرنشان کرده که در این گفتگوی تلیفونی، توافق شده که هیات افغانستان با هیات تاجیکستان در مورد مسایل سیاسی میان دو کشور، همکاری های اقتصادی و امنیتی به ویژه مبارزه علیه تروریزم و مواد مخدر، نیز گفتگو کنند.
افزودن دیدگاه