به دنبال ذکر جایگاه فرد دوم کشور برای عبدالله عبدالله در توافقنامه سیاسی با اشرف غنی، ارگ ریاست جمهوری می گوید که قانون اساسی مقام دوم کشور را برای معاون اول ریاست جمهوری محفوظ ساخته است.
ارگ ریاست جمهوری امروز یک شنبه(28ثور) با نشر یک اعلامیه گفته است که بر اساس توافق سیاسی زیر چتر قانون اساسی میان محمداشرف غنی و عبدالله عبدالله، عبدالله از نظر تشریفات و پرتوکول در مسایل مربوط به مصالحه ملی، جایگاه مقام دوم کشور را دارا است.
ارگ تاکید کرده: “قانون اساسی جمهوری اسلامی افغانستان مقام دوم کشور را برای معاون اول ریاست جمهوری محفوظ ساخته است.”
این در حالی است که امروز توافق نامه سیاسی میان اشرف غنی و عبدالله به امضا رسید که بر بنیاد آن، عبدالله عبدالله به حیث رئیس شورای عالی مصالحه ملی از سهم 50 درصدی قدرت در کابینه و حکومت برخودار است.