آمریکا در ادامه کمک های امنیتی خود به دولت تاجیکستان، از یک پاسگاه مرزی برای این کشور در مرز مشترک با افغانستان بهره برداری کرده است.
جان جینکل، سفیر امریکا در تاجیکستان و دگروال شهیون عبدوسطور ، معاون فرمانده نیروهای مرزبانی تاجیکستان، در مراسم افتتاح پاسگاه مرزی “اوکولون” شرکت کردند.
این پاسگاه زیر نظر کمیته ملی امنیت ملی جمهوری تاجیکستان و برای نیروهای مرزی این کشور ساخته شده است.
به گزارش امروز(شنبه، ۱۱ عقرب) اکی پرس، هزینه پروژه ساخت و ساز این پاسگاه توسط سفارت آمریکا در تاجیکستان و با هزینه 900 هزار دالر تأمین و اجرا شده است.
این پاسگاه مرزی با افزایش ظرفیت نیروهای مرزی تاجیکستان، امکان نظارت و گشت زنی مداوم در مرز با افغانستان را در منطقه شاهیتوس در ولایت خاتون فراهم می کند.
این تسهیلات توانایی نیروهای مرزی تاجیکستان را به طور چشمگیری افزایش می دهد تا از محدوده مرزی 15 تا 20 کیلومتری نظارت کنند و از تهدیدهایی نظیر قاچاقچیان مواد مخدر ، قاچاقچیان انسان و افراط گرایان جلوگیری کنند.
این در حالی است که سفارت آمریکا با هدف تقویت امنیت مرزی تاجیکستان، از ساخت و بازسازی 9 پاسگاه مرزی و 2 ناوگان در امتداد مرز تاجیکستان و افغانستان حمایت کرده است.
دولت ایالات متحده از سال 2005 به این سو، بیش از 100 میلیون دالر برای تقویت امنیت مرزی تاجیکستان کمک کرده است.
همچنین آمریکا به مدت 27 سال با تاجیکستان همکاری داشته است و بیش از 1.8 میلیارد دالر را از طریق برنامه هایی چون کشاورزی، بهداشت، آموزش، نهادهای دموکراتیک و امنیت، به این کشور کمک کرده است.