امام علی رحمان، رییس‌جمهور تاجیکستان در دیدار با رییس اجرایی افغانستان در شهر دوشنبه، پایتخت این کشور، صلح و ثبات در افغانستان را به نفع صلح و ثبات رشد و توسعه اقتصادی در منطقه خواند و خواهان گسترش روابط تجارتی ـ اقتصادی میان دو کشور شده است.
ریاست اجرایی حکومت در یک خبرنامه گفته است که عبدالله عبدالله بعد از ظهر روز گذشته(جمعه، ۲۴جوزا) در حاشیه اجلاس سران کنفرانس تعامل و اعتمادسازی در آسیا(سیکا) در شهر دوشنبه با امام علی رحمان دیدار کرده است.
در این دیدار رییس جمهوری تاجیکستان، افغانستان را از دوستان و متحدان استراتژیک این کشور خوانده، روابط میان دو کشور را مستحکم و استوار بر اصول و ارزش‌های مشترک تاریخی ـ فرهنگی دانسته است.
ریاست اجرایی نیز افزوده است که رییس‌جمهور تاجیکستان اعلام آمادگی کرده تا با افغانستان در تمام‌عرصه‌ها همکاری نماید.
وی ضمن قدردانی از توجه و علاقمندی خاص رییس‌جمهور تاجیکستان به قضایای افغانستان و کمک به صلح و بازسازی کشور، بر تحکیم و گسترش روابط میان دو کشور تأکید نموده و خواهان افزایش دادوستد تجارتی و توسعه اتصال منطقه‌ای میان افغانستان و تاجیکستان گردیده است.
این در حالی است که عبدالله عبدالله برای اشتراک در پنجمین اجلاس سران کشورهای عضو کنفرانس تعامل و اعتمادسازی در آسیا(سیکا)، بعد از ظهر روز گذشته به تاجیکستان رفته است.
افزودن دیدگاه