اتمر برای تقویت روابط افغانستان با تاجیکستان عازم دوشنبه شد

توسطفریدون حسنی

شهریور ۲۷, ۱۳۹۹ به روز رسانی : بهمن ۲۶, ۱۴۰۲

وزارت خارجه اعلام کرده است که محمد حنیف اتمر، سرپرست این وزارت به دعوت رسمی وزیر خارجه تاجیکستان برای تقویت روابط افغانستان با تاجیکستان در بخش‌های امنیتی، سرحدی و اقتصادی عازم دوشنبه شده است.

وزارت خارجه گفته است که آقای اتمر در رأس یک هیأت بلند پایه دولتی برای یک سفر دو روزه امروز پنج‌شنبه (۲۷ سنبله) عازم شهر دوشنبه، پایتخت تاجیکستان شده و قرار است با مقامات آن کشور دیدار و گفتگو کنند.

وزارت خارجه افزوده که آقای اتمر در این سفر قرار است با امام علی رحمان، رئیس جمهور، قاهر رسول‌زاده نخست وزیر، سراج‌الدین مهرالدین، وزیر خارجه، و سید مؤمن یتیم‌اوف رئیس،کمیته دولتی امنیت ملی تاجیکستان دیدار و گفتگو کنند.

به نقل از وزارت خارجه،  محور گفتگوهای  سفر حنیف اتمر با مقامات تاجکستانی، مذاکرات روی تقویت هرچه بیشتر روابط دو کشور در بخش‌های امنیتی و سرحدی، ترانسپورت، سرمایه‌گذاری، تجارت و ترانزیت، و انرژی  خواهد بود.

این وزارت تاکید کرده که سرپرست وزارت خارجه را در این دیدار رسمی شماری از مقامات دولتی، والیان و اعضای پارلمان همراهی خواهند کرد.

این سفر سرپرست وزارت خارجه به تاجیکستان در حالی صورت گرفته است که به تاریخ ۳ سنبله رییس جمهور غنی و امام علی رحمان در گفتگوی تیلفونی توافق کرده بودند که تحت ریاست محمد حنیف اتمر، سرپرست وزارت امور خارجه، هیأت بین الوزارتی در روزهای نزدیک به تاجیکستان سفر و روی آجندای نشست رؤسای جمهور تاجیکستان و افغانستان به خاطر همکاری های بیشتر، کار کنند.

دو رییس جمهور همچنان در آن گفتگوی تیلفونی، توافق کرده بودند که هیأت افغانستان با هیأت تاجیکستان در مورد مسایل سیاسی میان دو کشور، همکاری‌های اقتصادی و امنیتی به ویژه مبارزه علیه تروریزم و مواد مخدر، نیز گفتگو کنند.

چقدر این پست مفید بود؟

روی یک ستاره کلیک کنید تا به آن امتیاز دهید!

میانگین امتیاز 0 / 5. تعداد آرا: 0

تا الان رای نیامده! اولین نفری باشید که به این پست امتیاز می دهید.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *