وزارت فواید عامه افغانستان از مسدود بودن شاهراه سالنگ و برخی جاده‌ها و مسیرهای ارتباطی ولایت‌های غزنی، غور، بدخشان، میدان وردک، بغلان، بامیان و دایکندی به دلیل تداوم برف‌باری‌های شدید در این مناطق خبر داده است.
در اعلامیه این وزارت آمده است: “در سالنگ‌ها هوا ابری بوده و ضخامت برف تا 2 متر رسیده است. پاک کاری از ساعت 12 شب گذشته تاکنون جریان دارد. بیش از 40 برفکوچ سرازیر شده است. از پل اولنگ الی هفته نور، طوفان شدید جریان دارد و اجازه پاک‌کاری برای پرسونل وزارت فواید عامه داده نمی‌شود”.
این وزارت در ادامه افزوده است که مسیرهای (مالستان، جاغوری و کوتل شمس‌الدین) ولایت غزنی، (بند بایان، لعل سرجنگل، کرامان، بند غوک) ولایت غور، (ولسوالی‌های داریم، ارگو، یاوان و راغستان ) ولایت بدخشان، (مسیر کوتل حاجی‌گک) ولایت میدان وردک، (مسیر کوتل سچی) ولایت بغلان و راه‌های ولسوالی‌های ولایات بامیان و دایکندی مسدود می‌باشد.
وزارت فواید عامه خاطرنشان کرده که تیم‌های عملیاتی، حفظ و مراقبتی و مسوؤلین ولایتی این وزارت تلاش دارند تا هرچه زدوتر این ساحات پاک‌کاری و مسیر را به روی ترافیک باز نمایند.
افزودن دیدگاه