پیشتازان کانکور سال 1397 برای ادامه تحصیل در رشته طب به کشور چین اعزام شدند.
در یک خبرنامه وزارت تحصیلات عالی آمده است، تکت‌های طیاره محمد عمادالدین دوم نمره، مختار سوم نمره و محمد هادی چهارم نمره کانکور، توسط معین علمی وسرپرست وزارت تحصیلات عالی، معین امور محصلان و رییس تحصیلات عالی در خارج به آنها داده شد و ایشان رهسپار چین گردیدند.
در این خبرنامه یادآوری شده که تهمینه پاینده، اول نمره کانکور 1397، به خواست خودش از رفتن به بورسیه تحصیلی کشور چین انصراف داده است.
این در حالی است که نجیب‌الله خواجه عمری، وزیر تحصیلات عالی در روز اعلام نتایج کانکور 1397، به پیشتازان کانکور سال گذشته و امسال وعده داد تا آنان را جهت ادامه تحصیل در رشته‌های دل‌خواه‌شان، به خارج از کشور اعزام می‌نماید.
چندی قبل نیز وزارت تحصیلات عالی، پیشتازان کانکور سال 1396 را جهت ادامه تحصیل در رشته طب، به یکی از دانشگاه‌های معتبر کشور چین اعزام نمود.
این وزارت گفته که تمام مصارف تحصیلی این دانشجویان به دوش این وزارت و کشور بورسیه‌دهنده است.
افزودن دیدگاه