وزارت صحت افغانستان آمار قربانیهای بیماری ایدز در جهان را «سرسام آور» خوانده و گفته که در سال 2017 میلادی تنها در افغانستان 7500 واقعه مثبت اچ.آی.وی ثبت شده است.
فیروزالدین فیروز، وزیر صحت افغانستان روز گذشته (شنبه، 22 ثور) در نشستی به هدف مبارزه با بیماری ایدز در کابل، گفت که «تن فروشی» و اعتیاد به مواد مخدر دو عامل عمده شیوع ویروس ایدز در افغانستان است. به گفته او، در افغانستان بیشتر از سه میلیون نفر معتاد به مواد مخدر هستند، اما آمار روسپیها یا «تنفروشان» مشخص نیست.
با این حال، این وزارت برای مبارزه با بیماری ایدز، برنامه آگاهیدهی را از طریق عالمان دینی آغاز کرده است.
از سویی هم به گفته وزیر صحت افغانستان، سیزده مرکز پیشگیری و تداوی بیماری ایدز در کابل و برخی ولایتهای دیگر این کشور فعال هستند.